AKP/MHP yan sazkara dewleta gendel û şoven!?

Desthilatdariya AKP/MHPyê ya ku li ser xwîna gelan siyasetê dike, hewl dide hemû pirsgirêkên Tirkiyayê ji pirsgirêka kurd, demokratîzekirina dewletê, belavbûna cureyên gendelî û talankirina dewletê bi rêya olîgarişiya teng, bê çareserî bihêle. Ev desthilatdariya şoven, dektator û gendel, îro bi rêya êrîşên li ser binsaziya herêma Bakur û Rojhilatê Sûriyayê, hewl dide li ser siyaseta xwe binxumîne, rojevê biguherîne û jiyana xwe dirêj bike.

Ev desthilatdariya AKP/MHPyê ya ku alavên mediyayê girtiye dest xwe û bi rêya belavkirina derewan û berovajîkirina rastiyan, dixwaze rê li ber demokratîzekirina Tirkiyayê bigire û li şûna çareserkirina pirsgirêka kurd, şerekî giştî yê jiholrakirinê li dij kurdan bide meşandin. Ev desthilatdarî niha komkujiyan li dij kurdan pêk tîne. Hemû derfetên dewletê xistiye xizmeta şerê topyekbûn li dij kudan li hundur û derveyî Tirkiyayê. Ew vê siyaseta xwe li jêr durşima “tekoşîna li dij terorê” û “rêlibergirtina parçekirina Tirkiyayê” dimeşîne. Bi rêya medyaya kontrolkirî, ew hemû welatiyan sor dike û dixwaze wan li dij kudan bide xebitandin. Ji her kesî tê xwestin ku ew binkeftina aborî, xizanî, gendelî û rewşa xerab a jiyanê, ji bîr bike û li pey siyaseta şoven û şerxwaz a AKP/MHPyê bibeze.

Rast e ev êrîşên ku niha dewleta tirk li dij binsaziya herêma Bakur û Rojhilatê Sûriyayê pêk tîne, beşek e ji konsepta jiholêrakirina kurdan e. Jixwe dewleta tirk vê armancê venaşêre û eşkere dibêje, ew ê heremê têk bibe, çavkaniyên jiyanê birûxîne û welatiyan derbider bike. Lê her wiha aliyekî din ê bi rewşa Tirkiyayê ya hundirîn ve girêdayî ye, heye. Ew jî xapandina welatiyan, berovajîkirina rastiyan û dewamkirina li ser desthilatdarî ye. Tê xwestin, ku welatî xwe ji bîr bikin û tenê bi şerê li dij kurdan mijûl bibin.

Li jêr desthilatdariya AKP/MHPyê, aboriya Tirkiyayê têk çûye. Niha yek dolar bi nirxê 30 lîreyê ye. Beriya çend salan yek dolar tenê bi 3 lîreyan bû. Bi dehhezaran bijîşik, endezyar, pisporên zanist û teknîke û maldar ji welat dervin û berê xwe didin derve. Di sala 2023yan de bi qasî 64 hezar kes ji Tirkiyayê reviyane û berê xwe dane Almanyayê. Li gorî rapora dezgeha karûbarê penaberan a Almanyayê, welatiyên ji Tirkiyayê, yên ku serî li penaberiyê li Almaniyayê dane, duyemîn koma mezin a penabran e piştî welatiyên ji Sûriyayê (104 hezar). Weha diyar dibe ku li jêr desthilatdariya AKP/MHPyê xizanî û zordarî li Tirkiyayê belav bûye. Ji bilî malbatên Erdogan û kesên payebilind ên AKP û MHPyê, ku bazirganiyê dimeşînin û tevahiya aboriya dewletê bi xwe ve girêdane, her kes xizanî û zehmetiya jiyanê dikşîne. Malbata Erdogan û olîgarşiya teng, li derdora xwe komên rantxwar civandine.

Şerê têkbirin û jiholrakirina binsaziya herêma Bakur û Rojhilatê Sûriyayê, beşek e ji konsepta AKP/MHPyê ya mayîna li ser desthiladariyê û bicihkirina olîgarşiya teng a dizek û gendel e. Bi rêya geşkirina hizira şoven, sorkirina gelê tirk li dij kurdan, tê xwestin ku mirov dûrî rastiya heyî bikevin, rewşa jiyana rojane a xerab ji bîr bikin û li pey propagandeya hikûmetê biçin. Ev şêweyê hukumdariyê di dîrokê de naskîri ye. Hikûmeta olîgarş a ku xwîna welatiyan dimije, aboriya welat talan dike û berê dewletê dide şerê navxweyî.

Tirsa  rejîma AKP/MHPyê ya mezin ji wê yekê ye, ku ew desthilatdariyê winda bike û li pêşiya gel wek olîgarşeyek dizek, rantxwar û şerxwaz were darezandin. Erdogan ditrse ku ew û malbata xwe mîna Sedam û malbata wî werin darezandin. Lîsteya sûcên wan dirêj e: Gurkirina şerê ku bi hezaran zarokên xizan û kedkaran bûne qurbaniyê wî, rêlibergirtina demokratîzekirina dewletê û çareserkirina pirsgirêka kurd, talankirina dewletê û diziya nan û azadiya gelên Tirkiyayê…