Wek pênasîn, em dikarin bibêjin ku Navenda Kurdî ya Lêkolînan (NKL) di sala 2014`an de hatiye damezirandin. Ew mîna saziyek serbixwe ya ji bo lêkolînkirina rewşên/ aliyên siyasî, aborî, civakî û stratîjî li Rojavayê Kurdistanê, Rojhilata Navîn û tevahiya cîhanê, ava bûye.
NLK heta niha bi zimanê erebî berhemên xwe belav dikir. Wê bi sedan Lêkolîn, nêrîn, werger û gotarên di hemû beşên zanistê de pêşkêşî xwendevanan kiriye. Wek nasname, NKL xwe bi saziyek kurdî dizane, lê ew zanistek bêalî û şîroveyek rasteqîn ya rewşê, analîzkirina reyalîta civakê wek ku ew heye, armanc digire. Ew aliyên neronîkirî û sansorkirî yên mijarên girêdayî Kurdan, Rojavayê Kurdistanê, Sûriyê û Rojhilata Navîn dide pêş. Her wiha, li ser astek global jî lêkloînan dike. Ew mijarên mîna globalîzim, şerên herêmî, hilbirîn û pêşbaziya pêşxistina çekan û islama siyasî jî dişopîne.
NKL hewl dide diyalogekê di navbera Kurd û Ereban de durust bike û vê diyalogê dewrî hevdûnaskirinekê ku li ser bingehek zanistî ava dibe, bike. Di vî karê zanistî de cihê rexneyê û nêrîna din jî heye. Armanc ew e, ku bi riya kar û barê NKL civak bi awayekî zanistî ya profesyonel were agahdarkirin û ew karibe zemîna xwenûkirin û xweguhertinê deyne. Ev civak rastiya rewşê û guhertinên herêmî û cihanî nas bike. Ew nêzîkî hev bibe û li ser bingeha jiyanek hevbeş, cihêreng û demokrat, xwe bi hev bide qebûlkirin.
NLK dixwaze taybetmendiyên dîrokî, civakî, çandî û siyasî yên her pêkhatiyekê derxe holê û derfetê bide wê yekê, ku ev pêkhatî were naskirin û mîna dewlmendiyekê bête diyarkirin. Her wiha NKL dixwaze cih û rola jinê jî analîze bike. Ew deriyê xwe ji bo hemû lêkolîn û şîroveyên derbarê jinê de vedike.
Ji sala 2014`an de û vir ve, NKL bi sedan lêkolîn û şîroveyên dirêj belav kiriye. Ew Lêkolîn ji aliyê gelek zanîngeh, dezgeh û navendên lêkolînan mîna jêder hatine bikaranîn. Her wiha bi dehan ji têzeyên doktora û masterê li gelek zanîngehên welatên ereb, Ewropa û DYA yê, lêkolîn û madeyên zanistî yên ku NKL belav kirine, wek jêder bikar anîne.
NKL cihekî xwe yê taybet di nava dezgeh û navendên lêkolînan girtî ye. Ew niha bûye jêderekî sereke ya wergirtina agahdarî û şîroveyên zanistî yên derbarê herêma Rojavayê Kurdistanê û tevahiya heremê de. Lêkolîner, xwendevanên beşên bilind ên siyaset û civakê, êdî NLK dişopînin û analîz û lêkolînên wê ji bo xwe dikin çavkanî û jêdera pêbawer.
Ev wek pênasînek kurt ya karê NKL ji sala 2014`an ve (beşê erebî), lê em ê niha dest bi weşana beşê kurdî bikin. Êdî NLK dê bi zimanê kurdî lêkolîn, şîrove, nirxandin û nêrînên di hemû beşên zanyariyê de belav bike. NKL ya kurdî dê xwedî armancek sereke be, ew jî ji bo xwendevanên kurd, ragihandina wêneyekî geştî û rasteqîne ji rewşa herêma Rojavayê Kurdistanê û tevahiya Rojhilata Navîn re.
NLK a kurdî dê ne agahî û nûçeyên lezok û kurt bide, lê wê lêkolînên bi dehên rûpel, şîroveyên dirêj yên taybet, werger û nêrînên ku xebatkar û nivîskarên wê amede dikin, ji bo Kurdan û hemû xwendevanên bi zimanê kurdî, belav bike.
Ev demeke ku em li ser amedekirina beşê kurdî yê NKL radwestin. Me xwest ku em li gorî navê xwe bin û bi hijmarek mezin û dewlemend ya lêkolîn û şîroveyan werin qada belavkirina kurdî. Em dixwazin rewşa li welatê xwe bi zimanê kurdî, bi formek akadîmî ya bilind, vebêjin û bi xwendevanên kurd re parve bikin.
Li gel lêkolînên taybet bi beşê kurdî, dê liva wergerê ji beşên erebî û ingelîzî aktîv be. Ew lêkolîn û şîroveyên ku bi taybet ji bo NKL bi zimanên erebî ingelîzî tên amedekirin, dê bo beşê kurdî werin wergerandin. Ev kedek mezin û karekî hayedar û profesyonel dixwaze.
Em hêvî dikin û wek armanc li pêşiya xwe dibînin, ku NKL di cîhana peyva kurdî de deriyekî zanistê veke û ji bo hemû akadîmîkar, rojnamevan û xwendevanên peyva kurdî bibe alava pêbawer ya şopandin û zanistwergirtinê.
Rêveberiya Navenda Kurdî ya Lêkolînan li Almanyayê
