Rojev Kurdistan e

Şerê ku îro li Xezayê diqewime, ku bala alavên ragihandinê yên cîhanî dikşîne û niha bûye rojev, divê bi tu awayî şerê ku dewleta tirk li Kurdistanê dimeşîne, nenixumîne. Divê alavên ragihandinê yên kurd seferber bibin, da ku şerê ku desthilatdarîya AKP/MHPyê li Kurdistanê dimeşîne deşîfre bikin û tekoşîna kurdan ya li dij dewleta tirk û çeteyên DAIŞ di rojevê da bihêlin.

Li Kurdistanê şerekî giştî heye. Dewleta tirk bi hemû hêza xwe şerekî topyekbûn li dijî hebûn û hêza kurdan dimeşîne. Li ser hemû astan, li dij destkeftî û sewerîya neteweya kurd, dewleta tirk hemû hêza xwe serferber kiriye. Ew di qada siyasî û leşkerî da li dij kurdan di nava şerekî mezin da ye. Mirov dikare bibêje, ku dewleta tirk ev serê /10/ salan e, jiholrakirina kurdan ji bo xwe kiriye kar û armanca sereke. Desthilatdarîya AKP/MHPyê hemû derfetên dewletê ji bo artêş û istixbaratê terxan kiriye, da ku karibe kurdan têk bibin. Ew bi milyaran dolar li şerê ku li Bakur, Başûr û Rojava li dij kurdan dimeşîne, xerç dike. Xerçkirina ewqas pere li ser hesabê bipêşvebirin, nûjînkirin û geşkirina Tirkîyayê ye. Wek encama vê siyaseta leşkerkirina dewletê û meşandina şerekî giran bi vê berfirehbûnê, beşên aborî, zanistî, tendurustî û civakî yê dewletê li paş mane.

Şerê ku desthilatdarîya AKP/ MHPyê li dij kurdan dimeşîne û destwerdana Enqerayê ya welatên ereb li jêr hizira bicihkirina projeya “Osmanya Nû” derfetên vî welatî tarûmar kiriye. Ev hizira hegemon bipêşveçûn û bipêşvexsitina Tirkîyayê asteng dike, rê li ber aşîtiya navxweyî û çarserkirina pirsgirêka kurd digire. Berovajî vê yekê, ew dewletê dixe bin barekî mezin, aborîyê têk dibe û Tirkîyayê dike navendeka durustkirina tevlihevîyê.

Li hemberî vî şerê giştî yê ji bo têkbirin, jiholrakirin û derbiderkirina kurdan tê birêvebirin, di serî da Tevgera Azadîya Kurdistanê, hemû hêzên kurdan di pososyona xweparastinê da ne. Li Bakur, Başûr û Rojava şerekî mezin heye. Bi dehhezaran leşkerên dewleta tirk bi hemû alavên şer yên giran û bipêşketî, komkujîyan li dij mirov û axa Kursitanê dimeşînin. Bajar û gundan dişewetînin û xwezaya Kuristanê wêran dikin. Heta bi çekên kîmyayî, bombeyên fosforê û nûklera bisînor, bi kar tînin û ava Kurdistanê jehr dikin.

Li tevahîya herema Rojhiltana Navîn şerekî wiha mezin û qirêj nayê kirin. Duyemîn mezintirîn artêşa NATOyê li himberî kurdan û hêzên wan şerekî nehevseng bi rê ve dibe. Her sal wek plançoya vî şerî hijmara windahîyên artêşa tirk bi hezaran heye. Berxwedanek efsaneyî bi kêmtrîn derfet û alavên xweparastinê tê jîyankirin. Li gel vî şerê ku dewleta tirk bi rêya artêş û istixbaratên xwe dimeşîne, her wiha şerekî din jî yê bi rêya komên çete yên kirêkirî dimeşîne. Desthilatdarîya AKP/MHPyê komên çete yên derveyî qanûnê û hêzên cîhadîst yên global (DAIŞ û El-Qaîda) bi ser kurdan ve dişîne. Van hêzan bi salane êrîşên giran birin ser bi dehan bajarên Kurdistanê û hewl dan Kurdistanê wêran bikin û gelê kurd derbider bikin. Hêzên kurdan bi serkêşîya Tevgera Azadîya Kurdistanê berxwedanek bêhempa meşandin û di şerê li dij DAIŞê ji bo hemû cîhanê bûne mînaka berxwedana gelan, parastina jinê û nirxên jîyan û azadîyê. Kurdan tevahîya cîhanê ji DAIŞê xelas kir. Cîhan minetdarê kurdan e.

Divê ev berxwedana heyî û berdewam, li her deverê û li ser her platformê bê gotin û ronîkirin. Divê ev berxwedana ku her roj xurtir û gurtir dibe, di rojeva herema Rojhilata Navîn û tevahîya cîhanê da berz bimîne. Divê tu carî rojev neyê guhartin û ev berxwedan, şerê xweparastin û bervanîya nirxên mirovatîyê, neyê paşguhkirin. Komkujîya ku dewleta tirk li Kurdistanê dimeşîne û dixwaze ser binxumîne, divê bê vegotin û ronîkirin. Hemû alavên ragihandinê yên kurdan, hemû birêxsitin û kesayetî li Kurdistanê û derveyî wê, divê vî şerê qirêj yê dewleta tirk ji tevahîya cîhanê ra eşkere bikin û rûyê reş yê desthilatdarîya AKP/MHPyê eşkere bikin. Divê hemû cîhan zanibe ku ev rêjîm komkujîyan dike û kurd jî xwe diparêzin û berxwedaneka rûmetê dimeşînin.

Şerê ku îro li Xezayê diqewime, ku bala alavên ragihandinê yên cîhanî dikşîne û niha bûye rojev, divê bi tu awayî şerê ku dewleta tirk li Kurdistanê dimeşîne, nenixumîne. Divê alavên ragihandinê yên kurd seferber bibin, da ku şerê ku desthilatdarîya AKP/MHPyê li Kurdistanê dimeşîne deşîfre bikin û tekoşîna kurdan ya li dij dewleta tirk û çeteyên DAIŞ di rojevê da bihêlin. Divê tekoşîn û fedekarîya şervanên azadîyê mijara sereke ya tevahîya ragihandinê kurdî be. Divê em nekevin bin bandora medyaya ereb û tirk û rojevê biguherînin. Şerê ku dewleta tirk û çeteyên wê, çi DAIŞ û çi jî çeteyên “Artêşa Wetenî”, li dij kurdan dimeşînin û ev komkujiyên mezin yên li Şingal, Kobanî, Efrîn, Serê Kanîyê û Girê Sipê, hatin kirin, şerekî mezin yê sedsalê ye. Desthilatdarîya AKP/MHPê vî şerî bi pîlan bi çûk dike û bi hezaran kuştîyên artêşa tirk nabêje û ser mijarê digre. Divê ragihandina kurd rûyê reş yê dagîrkerîya tirk eşkere bike. Divê dîmenên çalakîyên bersevdayînê yên hêzên leşkerî yên neteweya kurd werin belavkirin û sernûçe bin. Divê dîmenên bikarînan çekên kîmyayî, wêrankirin û şewitandina xwezaya Kurdistanê û heta dîmenên şewitandina arteşa tirk cenazyên leşkerên xwe li Heremên Parastina Medyayê, bên belavkirin û dubarekirin. Şerê ku îro li Kurdistanê dibe, siberoja heremê dîyar dike. Çawa kurdan DAIŞ têk bir û ewlekarîya cîhanê parast, ew îro derbeyan li hizira kolonyal û faşîst ya desthilatdarîya AKP/MHPyê dixe. Ew rê li ber teror û tevlihevîya gerdûnî ya ku ev desthilatdarî saz dike û serkêşîya wê dike, digire.

Ji me hemûyan tê xwestin, ku em Kurdistanê û tekoşîna berxwedanî û tekoşerên kurd li Bakur, Başûr û Rojava di rojevê da bihêlin û hemû alîyên vê tekoşînê ronî û zelal bikin. Divê em Kurdistanê bihêlin/bikin rojeva cîhanê.