Medyaya kurdî û eşkerekirina derewên rejîma AKP/MHPyê

Dewleta tirk êrîşa Îrsaîlê ya li ser Xezayê ji bo pêkanîna berjewendiyên xwe bi kar tîne. Ew hewl dide xwe mîna “seroka cîhana îslamî” bide pêş û bi rêya hin propagandayên li hundur û derve, siyaseta xwe ya dagîrkeriyê li heremê rewa dike. Di rastiyê de, ew têkiliyên xwe yên aborî bi Îsraîlê re xurt dike û bi taybet vê demê lezê dide liva bazirganiyê. Li gorî çavkaniyan, dewleta tirk di van mehên dawî de bi sedan milyon dolar bazarganî bi Îsraîlê re kiriye.

Li ser vê liva bazarganiyê, dewleta tirk dixwaze binuxmîne. Ji bo vê yekê bibe serî, ew bi rêya medyayê bi şêweyekî teyorîk, êrîşî Îsraîlê dike û xwe mîna xwediyê gelê Xezayê bide nasîn. Her weha ew destûrê dide xwepêşandanên gelerî li Tirkiyayê, ku li dij êrîşa Îsraîlê derkevin û hizra nifretê li dij Îsraîlê û gelê cihû eşkere bikin. Li Tirkiya û bakurê Kurdistanê xwepêşandanên pilankirî ji aliyê rejîma AKP/MHPyê ve hatin organîzekirin. Armanca dewleta tirk ew bû, ku ji cîhana erebî û îslamî re bide diyarkirin, ku dewleta tirk li dij êrîşên Îsraîlê yên li ser Xezayê pêşengtiyê dike û ji bo dawîanîna li van êrîşan di nava liv û tevgerê de ye.

Bi taybet medyaya dewleta tirk ya ku bi zimanê erebî weşanê dike û medyaya li jêr kontrola Qeter û rêxsitinên Ixwan El-Muslimîn, vê propogandaya dewleta tirk belav dikin û dewrî rastiyekê dikin. Hewl tê dayîn, ku AKP û Erdogan mîna “parastvanên Xezayê” û “neyarên Îsraîlê” werin pêşkêşkirin. Heta radeyekê vê hizirê cihê xwe li nava gelên ereb girtî ye. Jixwe tu alavên ragihandinê li cîhana ereban, li dij vê propogandayê û berovajîkirina rastiyê, nesekinîn û têkiliyên bazirganî yên rejîma AKPyê bi Îsraîlê re ronî û eşkere nekirin.

Li gel belavkirina vê derewê, medyaya li jêr kontrola rejîma AKP/MHPyê li dij kurdan jî kampaniya reşkirinê dide meşandin. Bi taybet bi zimanê erebî, ew kurdan û Tevgera Azadiya Kurdistanê bi alîkariya Îsraîlê re tewanbar û gunehkar dikin. Ew kurdan dikin hevkarên rejîma Netenyahû û Tirkiya jî dike dost û parastvana Xezayê û gelê filistînî.

Medyaya kurd, bi taybetî ya ku bi zimanê erebî weşanê dike, pêwîst e vê mijarê bike fokosa xwe û derewên AKPyê eşkere bike. Pêwîst e têkiliyên bazirganî yên dewleta tirk bi Îsraîlê re werin ronîkirin û hemû datayên wê li ber çavên raya giştî werin raxsitin. Bi rêya lêkolîn, gotar û bernameyên TVyan, medyaya kurd a bi zimanê erebî dikare vê hewledana berovajîkirina rastiyan a AKPyê pûç bike û têk bibe. Bi rêya bi sedan ji pispor, akadîmîsyan û rojnamevanên ereb û erebîaxêf, medyaya kurd dikare bi datayan derewên rejîma AKP/MHPyê eşkere bike û rûyê reş ê vê rejîmê diyar bike. Li cîhana erebî bi dehan navendên lêkolîn û beşên zanîngehan ên derbarê Tirkiyayê de hene, ew jî dikarin di ronîkirina rastiya siyaseta Tirkiyayê de roleke beriz bilîzin. Medyaya kurdî ya ku bi zimanê erebî weşanê dike, bi taybet TV û rojnameyên li Rojava, dikarin rolek beriz û diyarker a hetikandina siyaseta Tirkiyayê bilîzin.

Li dij konsepta şerê medyayê yê ku dewleta tirk dimeşîne, pêwîst e medyaya kurdî ya ku bi zimanê erebî weşanê dike, bi rola xwe rabe. Pêwîst e rastiya helwesta Tirkiyayê ya hevkara rejîma Netenyahû were nasîn. Pêwîst e medyaya kurdî bibe dengê rastiyê û çavkaniya agahiyên rast ên derbarê helwesta rejîma AKP/MHPyê de û temaşevanên ereb bi rêya informasyonên rast agahdar û hişyar bike. Pêwîst e medyaya kurdî ya bi zimanê erebî bibe dengê welatiyen ereb ên ku li derveyî medyaya Qeter û Ixwan El-Muslimîn, li rastiyan digerin.

Ev karekî girîng û lezgîn e.