Karê dîplomasî û pêwîstiya bi şêwirmendiyeke profesyonal!

Êrîşên dewleta tirk li ser binesaziya herêma  Bakur-Rojhilatê Sûriyê ji 23yê vê mehê heta niha dewam dikin. Ev cara  sêyem e ku dewleta tirk êrîşeke berfireh û giştî li dij binsaziya herêmê  pêk tîne. Armanca dewleta tirk têkbirin û jiholrakirina hemû çavkaniyên jiyanê ye. Dewleta tirk dixwaze hemû saziyên hilbirîn û xizmetguzariyê birûxîne, gelên herêmê bêderfet bihêle û naçarî koçberiyê bike.

Ji bo ku li ser asta navnetewî ev êrîş bên hetikanin û armanca wan ya rast bê diyarkirin û dişîfrekirin, pêwîstî bi karekî dîplomasî û siyasî yê mezin heye. Divê dîplomsiya herêma Bakur-Rojhilatê Sûriyê van hemû êrîşan tomar û dokoment bike û radestî aliyên navneteweyî yên pêwendîdar bike. Divê li ser asteke global rûyê dewleta tirk ê reş bê eşkerekirin. Ji bo ku ev kar bi awayekî profesyonal pêk were, divê rêxsitinên mafên mirovan ên kurdî, sûrayî û navnetewî jî alîkar bin.

Divê civaka navnetewî, Yekîtiya Ewropayê, NATO û DYA, wek aliyekî fermî, her wiha wek civakên sivîl, kiryarên dewleta tirk li herêma  Bakur-Rojhilatê Sûriyê nas bikin û ji hemû binpêkirinên mafên mirovan agahdar bin.

Wekî din mijarek girîng heye, ew jî pêwîstiya dîplomasiya herêma Bakur-Rojhilatê Sûriyê bi şêwirmendiyê ye. Di vê demê de şêwermendî karekî çarenûsyane ye, eger bê xwestin ku karê siyasî û dîplomasî bi şêweyekî profesyonal were birêvebirin. Ji bo rêvebiriya herêma Bakur-Rojhilatê Sûriyê û MSD pêwîstî bi şêwirmenidyê heye. Derbarê têkliyan bi aliyên siyasî yên sûriyayî re (çi rejîm an jî hêzên opozîsyonê) divê berpirsên herêma Bakur-Rojhilatê Sûriyê û MSD xwedî agahiyên berfireh û nûjen bin. Ev agahî tenê dikarin bi rêya tîmeke şêwirmend werin bidestxisitin.

Bi rêya tîma şêwirmendiyê, rêveberî û MSD dikarin ji hemû datayên aliyên din agahdar bibin. Derbarê hikûmeta Şamê, hêzên opozîsyonê de, dikare agahî û şîroveyên rasteqîn werin bidestxistin. Her wiha têgihaştinek û dîmenekî rasteqîn li gel kesên berpirsyar derbarê van aliyan de durust bibe. Karê siyasî û dîplomasî tenê dikare bi rêya hebûn û peydabûna tîmeke şêwirmendiyê ya pispor pêk were. Ev tîm dikare ji aliyê navendên lêkolînan an jî kesayetiyên zanistî û rewşenbîrî, yên xwedî zanîn, hizûr û tecrube, were peydakirin.

Bi rêya şêwirmendiyek pispor û li ser kar, dikare hemû karên siyasî û dîplomasî, çi têkilî dibin, an jî çi civîn û kongre dibin, bi awayekî tekûz û profesyonal werin meşandin. Eger kar bê şêwirmendiyek pispor bê birêvebirin, dê geke kêmasî derkeve. Dê aliyê dijberî herêmê û MSD xwe serwer û li jor bibîne û hewl bide kêmasiyan ji bo xwe bike destkeftî û herêmê û MSD reş bike.

Divê em zanibin ku li dij herêmê û MSDyê îro dewlet dixebitin. Dewleta tirk û hevalbendên wê bi dehan navendên lêkolînan ava kirine û bi milyonan dolar ji bo şerê herêma Bakur-Rojhilatê Sûriyê, MSD û HSD finanse dikin. Her wiha rejîma Şamê û derdorên wê jî xwedî heman derfet in. Ji ber vê yekê, divê herêma Bakur-Rojhilatê Sûriyê û MSD jî xwedî heman hêz bin. Jixwe navend, pispor û rewşenbîrên alîgerên herêmê û MSD, yên ku forma xweseriyê, mafên mirovan û jinê esas digrin, li dij nijdperestiyê û îslama siysî ne, pir in û ew dê ji bo alîkariyê û dayîna şêwirmendiyeke ji dil û rasteqîn amade bin.

Pêwîst e niha kar li ser vê mijarê were kirin…